Bilbao Bizkaiak hainbat plan eskaintzen ditu gure lurraldeko onena aprobetxatzeko, gure lurraldea ezagutzera hurbiltzen direnekin partekatzen ditugun esperientzia ahaztezinak. Bilbao Bizkaia ezagutzen hasteko, bost eguneko ihesaldia egin daiteke, interesgune nagusietako batzuk bisitatzeko eta betiko gogoratuko dituzun esperientziak bizitzeko.

1. eta 2. egunak. Bilbao Bizkaia ezagutzen

Gutxienez bi egun eman behar dira Bilbao Bizkaiako ezinbesteko mugarrietako batzuk bisitatzeko: Guggenheim Bilbao Museoa, Erdi Aroko Zazpi Kaleak, Gaztelugatxe, Bizkaia Zubia, Gernikako Batzar Etxea eta Zuhaitza, Bizkaiko Flysch-a, Urdaibaiko Biosferaren Erreserba, Gorbeiako Parke Naturala, kosta zirraragarrian murgiltzea, landa-eremu menditsuan deskonektatzea, gure kultura-ondarea eta historiaz eta xarmaz betetako herriak ezagutzea...

3. eguna. Surfa kostaldean

Kantauri itsasoaren izaerak eta 150 kilometro kostaldetik gora izateak Bizkaia olatuak hartzeko leku ezin hobea egiten dute. Bizkaiko hondartzek gustu eta maila guztietarako aukerak eskaintzen dituzte, bai kirol hori egiten hasteko, bai esperientzia gehien duten surflarientzat, eta gure kostaldeko surfeko giroko nazioarteko lehiaketetan surflari profesionalen erakustaldiez gozatzeko.

Adibidez, gure itsasertzean dago munduko olaturik berezienetako bat, Mundakako olatua, munduko ezkerreko olaturik onenetakotzat jotzen dena. Urtero, herrialde guztietako surflariak hurbiltzen dira Urdaibaiko Biosferaren Erreserbaren erdi-erdian dagoen itsas herri txiki horretara, bost metroko altuerara eta 400 metroko ibilbidera irits daitekeen olatu gogor batez gozatzeko.

Udazken-neguko denboraldia ere une egokia da Bizkaiko olatu handiko surfean aritzeko. Haize areagotzen denean, Kantauri itsasoak bere olatu erraldoiak itsaslabarren kontra bultzatzen ditu, Punta Galean, Meñakozen, Mundakan eta Izaro uhartetik gertu.

Baina guztiak ez dira profesionalentzako olatu. Surflari amateurrek edo kirol honetaz gozatu nahi duten pertsonek bere trebetasunetarako olatu egokiak aurkituko dituzte hainbat hondartzetan. La Arena, Barinatxe, Arrietara, Plentzia, Gorliz, Bakio eta Laga ere surfean aritzeko eta bertan surfa bizitzeko toki ezagunak dira, non surf eskolak, surf friendly ostatuak, surfcamp-ak eta topera gozatzeko zerbitzu espezializatuak aurkituko baitituzte.

4. eguna. Ahaztuko ez duzun gastronomia

Bilbao Bizkaiari buruz hitz egitea mundu osoan bere aukera, kalitate eta sormenagatik ezaguna den gastronomiaz hitz egitea da. Gure Lurraldean daude munduko jatetxe onenetako batzuk, esperientzia ahaztezinak sortzeko tradizioa, irudimena eta produkturik onenak batzen dituztenak.

Bilbao Bizkaian gastronomia nola bizi dugun ulertzeko, ‘poteoarekin’ edo ‘txikiteoarekin’ hasi behar da. Herri bakoitzeko poteo eremu animatuenetako tabernetan barrena ibili behar da, ardoak eta txakolinak hartuz, koadrilarekin edo familiarekin hitz egin eta kantatzen den bitartean, giroaz gozatuz. Euskaldunen jangura oparoaren ohorez, Bizkaian edariak pintxoekin laguntzen ditugu, gure gastronomiaren erakusgarri diren mokadu txikiak. Gilda soiletatik hasi eta pintxo sortzaileenetaraino, aniztasuna amaigabea da.

Bilbao Bizkaian jatetxeak ere ikusgarriak dira. Betiko sukaldeetan, ohiko errezetak mimoz prestatzen dituzten horietan, gure gastronomiako plater ezagunenak eskaintzen dira, hala nola bakailaoa pil-pilean, pistoa Bilboko erara edo txipiroiak bere tintan, postre tipikoekin errematatutako janariak. Kostaldean, arraina da plater nagusia, batez ere bisigua, zapoa edo sardinak; barnealdean, haragia eta gure baserrietako baratzeko produktuak dira protagonista.

Lurraldeko goi sukaldaritzako jatetxeetako sukaldeetatik ateratako plateren sormen izugarria dastatzeko aukera ere ez da ahaztu behar. Nazioartean ezagunak diren jatetxeak, etxeko sukaldaritzaren jakintza eta kalitate handiko produktuak teknika berriekin uztartzen dituztenak, sukaldaritzako esperientzia errepikaezinak sortuz.

Gure gastronomiaren beste enbaxadoreetako bat txakolina da, Bizkaia osoan hegoaldera begira dauden magaletan hazten den ardo gazte eta frutaduna. Itsasoaren eragina nabari da ardo horretan, eta, agian, horregatik arrain eta itsaski-platerekin ezin hobeto uztartzen da, pintxoak dastatzen diren bitartean hartzeko ere bikaina dela. Txakolinaren sekretuak ezagutzeko, bisitak eta dastatzeak eskaintzen dituzten upeltegietako bat bisitatu behar da, edo Bakioko Txakolingunea Museora hurbiltzea.

5. eguna. Kulturarako paradisua

Bilbon, tradizioa eta modernitatea txoko bakoitzean nahasten dira. Gure arbasoek utzi zizkiguten tradizioak eta kondairak mantendu eta bizi ditugu, gure Lurraldetik igaro zirenek utzitako ondare ikusgarria gordetzen dugu eta artearen eta kultura unibertsalaren joera berrietara irekita gaude, gure nortasuna ahaztu gabe.

Euskara, euskaldunok partekatzen dugun milaka urteko hizkuntza, gure nortasun-ezaugarrietako bat da. Hizkuntza horren jatorria antzinakoa bada ere, inoiz baino biziago jarraitzen du gure herri eta hirietan. Bizkaiko iragan harrigarria Bilboko Arkeologia Museoan edo Euskal Museoan ikus daiteke, edo historiaurreko aztarnategi liluragarrietan, hala nola Santimamiñeko kobazuloan, Foruko aztarna erromatarretan, Ereñozarko erdi aroko aztarnetan,edo Elorrioko Argiñetako nekropolian.

Bizkaiko museoek iraganeko lanbideak ezagutzeko aukera ere ematen digute: arrantzaleen bizitza Bermeoko Arrantzaleen Museoan; Erdi Aroko burdinolena, Muskizko El Pobal burdinolaren zuzeneko emanaldietan; burdinaren meatzaritzaren lana, Abanto-Zierbenako Euskal Herriko Meatzaritzaren Museoan; edo txapel ospetsuak nola egiten ziren Balmasedako La Encartada Fabrika Museoan. Gernikan, Euskal Herria Museoak euskal identitatea definitzen duten ezaugarriak erakusten ditu, eta Bilbon barrena ibiliz gero, gaur egun ere gure lurraldean bizitza markatu zuen industria-ondarearen aztarnak ikus daitezke.

Tradizioak bizitzeko, herriko jaiak baino hoberik ez: koroak Santa Ageda bezperan kantatzen, Mundakako inauteri bitxiak, Balmasedako Aste Santuko pasio biziduna, ‘karmenak’ itsas herrietan, Lekeitioko Antzar Eguna, ‘madalenatan’ itsasora botatzen den teila, Bilboko Aste Nagusia... Aipamen berezia merezi dute abenduaren 21an landa-mundua hirira hurbiltzen duen Santo Tomas, Gabonetako ospakizunei hasiera ematen dien azokak; eta Olentzerok, abenduaren 25ean Bizkaiko haur guztien etxeak opari eta ilusioz betetzen dituen ikazkinak.

Bizkaia ere arte eta kultura garaikideaz gozatzeko Lurraldea da. Bilboko Arte Ederren Museoaz gain, non garai guztietako arte unibertsalaren maisulan batzuk ikus baitaitezke, Abandoibarran paseatzea arkitekto ospetsuenek (Gehry, Foster, Calatrava, Isozaki, Rogers, Moneo, Pelli…) imajinatutako eraikinen artean ibiltzea da, eta Zorrotzaurre eta Bilbo Zaharra bezalako lekuetan kultura-proposamen alternatiboak eta kaleko arte berritzaileena aurkituko ditugu, hurrenez hurren.