Mundaka, Bizkaiko surfaren bihotza
Bizkaia, kostalde paregabea izateaz gain, Europa zein mundu mailan erreferente garrantzitsua da gaur egun, baita surfaren munduan potentzia nagusia ere.
Mundakarrak harro senti daitezke, surflari askoren ametsa baitute herria eta, bere kategorian, Europako onena den Ezkerreko Olatua dute euren uretan.
Urtero, ehunka kirolarik bisitatzen dute Mundakan eratzen den eta Laidako hondartzan hiltzen den olatu ezagun hau.
Aipatu olatua hego-mendebaldeko haizeekin eratzen da eta lau metroko altuera eta 400 metroko luzera izatera heldu daiteke.
Izan, bizi eta gozatu
Tendentzia berrienak, zure esku
Europar askorentzat olaturik onena dena, Bizkaiko kostaldeko altxorrik preziatuenetakoa da; hau baita, apeu turistiko handienetarikoa munduan zehar. Herriak urtero poztasunez bisitari mordo bat erakartzen ditu. Hala ere, surfaz gain, gastronomia, paisaia ikusgarriak eta herritarren adeitasuna ere deigarria da bertara hurbiltzen direnentzat.
70eko hamarkadatik, bertako surflarientzat zein Euskal Herriko hondartzak ezagutu nahi dituztenentzat beharrezko geldialdia da. Surfaz gozatu eta Mundakako altxorrik preziatuena ezagutu nahi baduzu, ezinbesteko hitzordua da udazkeneko zein neguko urtaroetan. Leunagoak diren olatuak ere egon ohi dira, surfaz beste era batera disfrutatu nahi izanez gero. Betiere, garrantzitsua da kontuz ibiltzea eta itsasoko korronteak kontuan hartzea.
Mundakak maila altuko lehiaketak hartzen ditu urtero eta bederatzi aldiz izan da Mundu Zirkuituaren egoitza. Bere uretan murgildu diren pertsonaia ezagunenetako batzuk aipatzearren, Kelly Slater, 11 aldiz munduko surf txapelduna; Andy Iron, hiru biderrez munduko txapelduna; Dane Reynolds aktorea eta surf dokumentaletako parte hartzailea edota Aritz Aranburu, World Surf League 2015 edizioan lehenengoa Espainia mailan, besteak beste.
Surfak pisu handia badu ere, bertako giroak mundu mailako turistak zein euskal herritar asko erakartzen ditu. Portua da horren eragileetako bat. Uda garaian, haur, gazte zein helduak bildu ohi dira eguzkiaren berotasunaz eta itsasoaren kresalaz disfrutatzeko. Gazte ausartenek kai muturretatik uretara salto egiteko ohitura dute, gure kostaldeko bestelako herrietan egiten den bezalaxe. Bestalde, herriko bihotzean, Alde Zaharra aurki dezakezu; bertako kale estuak tabernez eta jatetxez josita daudela. Herritik apur bat aldenduta, berriz, Mundakako sekreturik preziatuena aurkitzen da: Santa Katalina baseliza, herriko beste ikonoetako bat, surfarekin batera.
Uztailean etorriz gero, ezin duzu Bay of Biscay Festival (Mundaka Festival izenez ezaguna dena) galdu. Bermeon ospatzen da jaialdia, Mundakatik 3 kilometrotara. Pop, rock edota indie musikaren jarraitzailea bazara, edota kontzertuak naturaren baitan entzuteko apeta baduzu, hauxe da zure jaialdia, dudarik gabe. Munda Musikaz gain, gastronomia beste protagonista nagusia dugu. Bere eszenatoki paregabetik jada igaro dira Rufus Wainwright, Caravan Palace, Fuel Fandango, Mon Laferte edota Tarque, beste askoren artean.
Nola heldu
Mundakara heltzeko trena zein autobusa har dezakezu. Esaterako, Bilbotik -alegia, Casco Viejo/Zazpikaleak geltokian, Bermeo helmuga duen trena hartu eta Mundakako geltokian jaitsi zaitezke. Begiratu ordutegiak hemen.
Gastronomia
Non jan
Gosea asetzearren, herriko tabernetatik zehar pintxoz pintxo ibiltzea gomendatzen dizugu. Hauek Alde Zaharrean zein portuaren inguruetan aurki daitezke.
Ostatua
Non lo egin
Herria oso handia ez bada ere, hainbat aukera daude ostatu hartzeko, dela aterpetxe, hotel, kanpin edota hostel batean.
Gainera, aipatutako jaialdira joanez gero, Mundaka Fest-ek bidaia agentzia batekin jartzen zaitu harremanetan eta bertatik kudeatu dezakezu hau guztia.