Metroz eroso iristen diren hiriko hondartzen, mareen arabera aldatzen direnen edo Bizkaiko kostaldea zipriztintzen duten itsasadarren bokalean daudenen artean aukeratu dezakezu. Surfa eta uretako beste kirol batzuk egiteko, eguzkia lasai hartzeko, etxeko txikienekin lasai gozatzeko edo kuadrillarekin primeran pasatzeko aproposak dira. Zure gustua edozein dela ere, Bilbao Bizkaian aurkituko duzu zure hondartza gogokoena.

Hauek dira Bilbao Bizkaiko hondartza onenetako batzuk:

• Ereaga. Garraio publikoa erabiliz Bilbotik erraz irits daiteke Getxoko 800 metroko hareatza erraldoi honetara, oinez Bizkaia Zubitik minutu gutxira dagoena. Arriluzeko kaitik Algortako Portu Zaharreraino doan ibilaldi atsegin batez inguratuta, ezin hobea da itsasoaz eta hareaz gozatzeko, surfa, bodyboarda eta boleibola egiteko edo eguzkitan atseden hartzeko.

• Gorrondatxe. Aizkorri bezala ere ezaguna, Getxo udalerriko hondartza hau Uribeko kostako horma bertikaletan irekitzen da itsasora. Hareazko dunek, itsaslabarrek eta Kantauri itsasoak ingurune natural ia ukigabea osatzen dute, eta leku lasai baten bila dabiltzanek eta Akantiko olatu ospetsua surfean egin nahi dutenek gozatuko dute.

• Barinatxe. Hondartza hau, Sopelan aurki daitezkeen hiruretako bat, kostaldeko naturalenetakoa da. Inguru horretako itsasoaren bortizkeriak eta inguruko itsaslabarrek ‘La Salvaje’ goitizena eman diote. Olatu ugariek Bizkaiko surfaren meka bihurtu dute, eta itsaslabarretatik parapente hegan egin daiteke.

• Barrika. Barrika herriko hondartza basati honetara heltzeko itsaslabarretan eskailera batetik jaisten da, eta ia desagertu egiten da marea igotzen denean. Egitura geologiko harrigarrien eta ia ukitu gabeko ingurune naturalaren ikuspegi ikusgarriak ditu.

• Plentzia eta Gorliz. Plentzia eta Gorliz herrietan dauden bi hondartza hauek itsasbeherarekin elkartzen dira. Plentziako itsasadarraren bokalean badia lasai bati irekita daude, eta Bizkaian ezagunenak dira bere harearengatik, itsas pasealekuarengatik, inguruko aisialdi-eremuarengatik eta uren lasaitasunarengatik. Oso egokiak dira uretako kiroletan hasteko.

• Bakio. Gaztelugatxetik gertu, Bakioko hondartza dago, Bizkaiko hareatzarik luzeena. Ibilbidetik kostaldeko paisaia zoragarriaz goza daiteke, harea fina ezin hobea da hondartzan familiarekin egoteko, eta bere uretan surfa maite dutenak elkartzen dira.

• Aritzatxu. Bermeoko kala txiki honek, kostako itsaslabarren artean ezkutatuta, urre-koloreko harea, arroka handiek eta urpekariek maiz erabiltzen duten ur gardenak osatutako paisaia natural ikusgarria ditu. Ingurune lasaigarria Kantauri itsasoan bainu bat hartzeko.

• Laga. Ibarrangeluko duna naturalek eta Ogoño lurmuturreko mendi-puskak atmosfera berezia ematen diote hondartza lasai honi, Urdaibaiko Biosferaren Erreserbaren erdian. Kantaurira zabalduta dago, eta olatuei aurre egiten dieten surflariak eta urre-koloreko kilometro erdi hareaz gozatzen duten kuadrillak biltzen dira bertan.

• Ea. Kostaldeko Ea herri xarmagarriaren amaieran dago hondartza hau, bere portu txikiaren ondoan. Harana osatzen duten muinoen hormek inguratzen duten hareatza lasaia honek haurrentzako jolastokia du.

• Karraspio. Mendexan dago, Lekeitioko portuaren ondoan. Karraspioko hondartza lasaiak Garraitz uharte magikoaren ikuspegi ezin hobeak eskaintzen ditu. Itsasbeheran oinez joan daiteke hara. Surfean edo belan hasteko leku egokia da.

Bizkaiko 28 hondartzetako zerbitzuei, banderei, itsasoaren egoerari, ingurune naturalari, uraren kalitateari edo tenperaturari buruzko informazioa esteka honetan kontsulta dezakezu.