Ezagutu Bilboko hilerria

Ondare historiko eta kulturalaren erakusgarria, Bilbotik oso hurbil

Bilboko hilerria edo Vista Alegreko hilerria, askotan Derioko hilerria deritzona, Bizkaiko hiriburuko kanposantua da. 1902ko apirilaren 27an inauguratu zen eta, normalean Derioko hilerria bezala izendatu arren, Derio eta Zamudio herrien artean dago. Edesio de Garamendi arkitektoak hasi zuen proiektua, eta Enrique de Epalza haren laguntzaileak amaitu zuen lana.

Gaur egun, hilerriak 208 mila metro koadro baino gehiago ditu, eta 400.000 pertsona ingururen hilobiak daude bertan. Euskadiko nekropolirik handiena da, eta penintsula osoko aipagarrienetarikoa.

Bilboko hilerria bake, lasaitasun eta introspekzio gune bat da, baina arkitektura, arte, kultura eta historia aldetik duen aberastasunagatik ere da nabarmena.

Hilerriaren estiloa oso eklektikoa da, bere eskulturetan, panteoietan eta beste elementu arkitektoniko batzuetan estilo ezberdinak baitaude.

Historiako pertsonaia ospetsuak

Kanposantuan atseden hartzen duten milaka eta milaka pertsonen artean, bilbotar ospetsu asko daude. Pertsona horien izenak historia liburuetan ageri dira eta hiriburuko kale-izendegian daude.

Horren adibide dira Casilda Iturrizar andrea («ahateen parkeari» eta Epaltzaren alargunaren kaleari izena ematen diona) eta haren senarra, Tomás de Epalza; Tomás Meabe; Indalecio Prieto; Rafael Moreno Aranzadi (Pitxitxi); edo Gabriel Aresti; beste askoren artean.

Horrela, ingurunea ezagutzeaz gain, Bilboko hilerriak hiriaren historia eta protagonista izan zirenen bizipenak zuzenean ezagutzeko eta konektatzeko aukera ere eskaintzen die bisitariei.

Bisita gidatuak Bilboko hilerrian

Hiriko merkatu eta hilerriak kudeatzeaz arduratzen den erakundeak (Bilbao Zerbitzuak) aukera oso interesgarria eskaintzen du: nekropolia bisita gidatu baten bidez ezagutzea. Horrela, tokiaren historian, artean eta bitxikerietan sakondu daiteke modu zorrotz, atsegin eta eskuragarrian.

Une honetan, bisita gidatuen modalitate hauek daude eskuragarri:

• - Bisita orokorra: Bilboko hilerriaren historia eta ondarearen ikuspegi orokorra, baita hilerriek, oro har, historian zehar izan duten rolaren ikuspegi orokorra ere.
• - Hilerri bat artearekin: hilerrian ezkutatzen den ondare artistiko bikainean oinarritutako bisita.
• - Gerra-eremua: hilerrian arrastoa utzi duten gerra-gatazka desberdinak bisitatzen dituen bisita.
• - Pertsona ospetsuak: kasu honetan, hilerrian atseden hartzen duten bilbotar ospetsu eta nabarmenenak ezagutzea da bisitaren ardatza.
• - Bisita antzeztua: bisita mota berri bat da, eta bertan hilerriko pertsonaia ospetsuek beren historia kontatzen digute, baita hilerriarena eta Bizkaia osoarena ere.

Bisita gidatuez gain, hilerria edozein unetan doan bisitatu daitekeen gune irekia da.

Historia edo artea maite baduzu, edota Bilbao Bizkaiaren ondarearen txoko desberdin eta berezi baten bila bazabiltza, Bilboko hilerria bisitatzeak merezi du, zalantzarik gabe: lurralde honetako kulturaren eta historiaren zati garrantzitsu bat ezagutuko duzu hemen, eta, agian, protagonistek berek kontatuta.