Gehiago jakin nahi duten bisitarientzat edo gauza desberdinen bila dabiltzanentzat, jendeak ezagutzen ez dituen toki turistiko asko daude ingurunean. Hona hemen galdu ezin dituzun hainbat adibide.

Bilbao Bizkaian hain ezagunak ez diren eta liluratuta utziko zaituzten 5 leku

 

Garraitz edo San Nikolas uhartea Lekeition

Garraitz edo San Nikolas uharte txikia Lekeitioren parean dago, eta itsasbeheran oinez sartzeko aukera ematen du.

Paradisu natural koskor honek naturarekin eta itsasoarekin batera bizitzeko esperientzia lasai bat eskaintzen du, Bizkaiko herri politenetako batetik oso hurbil. Biodibertsitateaz gain, uharteak aztarna arkeologiko erlijioso eta militar oso interesgarriak ere baditu. Izan ere, 2019an Parke Arkeologiko izendatu zuten.

 

Loizaga Dorrea Galdamesen, auto klasikoen Erdi Aroko museoa

XIII. mendeko gotorleku bitxi hau Galdames gaineko muino batean dago, eta altxor harrigarri bat du barnean: Europako Rolls-Royce ibilgailuen bilduma pribatu handiena, 1910 eta 1998 bitartean egindako 45 ibilgailurekin.

Loizaga dorrea bera eta inguruan duen basoa benetan ederrak eta bikainak dira auto horiek miretsi ondoren paseo lasaia emateko.

 

San Pedro Atxarre baseliza, Urdaibai gaineko begiratokia

San Pedro Atxarre baseliza izen bereko mendiaren gainaldean dago (Atxarre mendia). 312 metroko muino bat da, Ibarrangelun kokatua, eta bertatik Urdaibaiko biosfera-erreserba osoa ikusten da. Izugarrizko ikuspegia dago goitik!

Urdaibaiko ikuspegia airetik ikustea nahikoa ez balitz, baselizara doan bidea ederra da, baita erraza eta familia osoak egiteko modukoa ere. Bidean zehar basoak, baserri zaharrak eta beste baseliza batzuk ikus daitezke.

 

Jentilzubiko arkua: natura eta legenda

Gorbeiako Parke Naturalak sekretu asko gordetzen ditu, eta hauxe da horietako bat: Jentilzubiko arkua naturak eskaintzen digun bitxi ikusgarria da, Dimako udalerrian aurki dezakeguna, Baltzolako haitzulotik gertu.

Euskal mitologiak jentilei egozten die Jentilzubiko arkuaren sorrera, antzinako garaietan inguru horretan bizi izan ziren indar eta botere handiko izaki mitologikoak.

Antzinako kondairak suspertzen dituen naturagune ikusgarria, ibilbide eta bidezidorrez betea. Bururatzen al zaizu emozio handiagorik?

 

Karrantza Haranaren edertasuna

Karrantza Harana Bilbao Bizkaian asko ezagutzen ez den gunea da, baina benetan ederra eta bisitariei asko eskaini diezaieke.

Mendikate malkartsuez inguratutako paradisu berdea da, eta bertan ur-korronteak, amildegiak, bidezidor korapilatsuak eta ondare historikoaren erakusgarri interesgarriak aurkituko ditugu (adibidez, Biañezko San Andres eliza, museo bihurtua, edo Aldeacuevako San Bartolome eliza, XVIII. mendekoa).

Gainera, Karrantzako zati ederrenetariko bat toki pentsaezin batean dago: lurpean. Izan ere, inguru honetan Armañongo Parke Naturalaz gozatu ahal izango duzu, 200 leize natural baino gehiago dituena. Bereziki nabarmentzekoa da Pozalaguako haitzuloa, estalaktitaz eta estalagmitaz betea, eta Europako leize harrigarrienen artean dagoena.

 

Orduan, zer? Bazatoz Bilbao Bizkaiaren ondare ezezaguna eta berezia sakonki ezagutzera? Lurralde honetan altxor ugari daude aurkitzeko zain. Beraz, ohiko tokiak bisitatzeaz gain proposatutako lekuak ezagutzera animatzen zaitugu: ziur gaude benetan gozatuko dituzula.