Bilbao Bizkaiako ingurune naturalean murgiltzeko 5 ibilbide proposamen

Ibilbide hauei esker, gozatu inguruko mendiez, haranez, basoez eta herriez, eta bizi ezazu esperientzia ahaztezina.

Bide Beltzetik Tologorrirako igoera

Tologorri edo Iturrigorri mendiaren tontor ikusgarria (1.068 m), Gorobel mendilerroan dagoena, benetan tentagarria da mendia atsegin baduzu.

Tologorrira igotzeko ibilbiderik ohikoenak Lendoñogoitin du hasiera, eta Bide Beltza zeharkatzen du. Bide estu hori ez da egokia bertigoa dutenentzat, baina ibarraren ikuspegi bikaina eskaintzan du.

Guztira 7,8 km dira, eta gutxi gorabehera 4 ordutan egin daiteke.

Ardoaren eta Arrainaren Ibilbidea (G3-38)

Energia eta abentura gustuko dutenentzat, Ardoaren eta Arrainaren Ibilbidea aukera bikaina da: Araban hasten da, Oiongo mahastien ondoan, eta Euskadi hegoaldetik iparraldera zeharkatzen du, Bermeoko porturaino.

Ibilbide honetako etapa gehienak Bizkaian daude, Otxandiotik aurrera. Urkiola eta Durango zeharkatu eta Urdaibaiko Biosfera Erreserba inguratzen dute, mendiz, basoz eta herri ederrez osatutako bide luze batean.

Denboran zeharreko bidaia da, guztira 162,8 km-ko distantzia du (Oionen hasita) eta 7 egun behar dira bukatzeko.

Elantxobetik Ogoñorako ibilbidea

Ibilbide eder hau Elantxobeko (Bizkaiko herririk politenetako bat, bisitatzea ere merezi duena) hilerriaren ondoan hasten da eta Ogoñoko begiratoki ikusgarriraino doa. Bideak asfaltoa du ibilbidearen lehen zatian, baina gero bidezidor batetik jarraitu behar da.

Ibilbide zirkularra da, eta 3 ordu behar dira hilerrira heltzeko, 5,5 km-ko ibilbidea egin ondoren.

Kantauri itsasoko ikuspegi izugarriak izango dituzu, Elantxoben eguna igarotzeko aukerarekin batera. Bazatoz?

Arrazolako Bide Berdea

Arrazolako Bide Berdea, Axpe-Atxondon dagoena, ezin hobea da naturaz erraz gozatu nahi dutenentzat.

Ibilbide eder hau Anbotoren itzal ikusgarriaren azpitik igarotzen da, hau da, Mariren bizilekutik, eta Arrazola ibaiaren harana zeharkatzen du trenbide zahar bati jarraituz.

Bidea erabat laua da, guztira 10 km-ko distantzia du (joan-etorri), eta ordubete eta erditan egin daiteke.

Gorliz eta Armintza arteko ibilbidea

Ibilbide erraz eta atsegina da, familia osoarentzat egokia, kostaldeko bi herri horiek eta haien artean dagoen paisaia berde eta urdin ederra ezagutzeko aukera emango dizuna.

Ibilbidean zehar, itsaslabar harrigarri batzuen gainean, Gerra Zibilaren ondoren eraikitako bunker zaharrak eta Gorlizko itsasargia, Euskadiko altuena, ikusiko dituzu.

Ibilbide osoak, joan-etorria eginez, 17 km-ko distantzia du, eta 6 orduko iraupena, gutxi gorabehera.