Bilbao Arena hiriko erabilera anitzeko erreferentziazko zentroa da. 2011n inauguratu zen, eta Bilboko erdigunean dago, Miribilla auzoan hain zuzen ere. 25.985 metro karratu ditu, instalazio moldakor eta multifuntzionalak. Bertan hainbat jarduera mota egin daitezke: enpresa, prestakuntza, merkataritza, kultura-, kirol-, gastronomia- eta musika-ekitaldiak, bai eta nazioko eta nazioarteko kirol-lehiaketak ere.

Bilbao Basket saskibaloiko klub profesionalaren egoitza izateaz gain, hainbat modalitatetako beste hainbat kirol ekitaldi ere hartu ditu, hala nola areto futbola, badmintona, gimnasia, dantza, izotza, etab.

Halaber, ohiko programazioan honako hauek daude: musika, kultura, kontzertuak, antzerki- eta ballet-ikuskizunak, zirku eta family showak, enpresa-ekitaldiak eta azokak, ekitaldi politikoak, sindikalak edo erlijiosoak.

Besteak beste, musikaren munduko pertsona ospetsuek bisitatu dute espazioa, hala nola Aitana, Camilo, Alejandro Sanz, Scorpions, Pablo Alboran edo André Rieu. Halaber, Revolution On Ice bezalako ikuskizunak, Cirque du Soleil-en hainbat emanaldi, Disney Live eta Disney On Ice, Horroreen Zirkua edo Apokalipsia bezalako antzerki-ikuskizunak, eta beste hainbat ekitaldi ere hartu ditu, hala nola Ura Bere Bidean, Fair Saturday, azokak eta kongresuak, besteak beste.

Bilbao Arena kontzepzio garaikideko ekipamendua da, edukiera handiak eta tipologia askotako ekitaldiak hartzeko diseinatua. Sarbideak eta espazioen antolaketak erabilera malgua ahalbidetzen dute, programatutako ekitaldiaren arabera. Irisgarritasun-baldintzak muntaketaren eta jarduera motaren arabera aldatu daitezkeenez, gomendagarria da bisita planifikatu aurretik, pertsona bakoitzak bere irisgarritasun-premien arabera, ekitaldiaren antolatzailearekin edo instalazioarekin harremanetan jartzea, eskuragarri dauden zerbitzuak eta sarbide-baldintzak egiaztatzeko.