Bisitatu Loizaga Dorrea eta ezagutu automobilaren historia

Dorretxeak 25 metroko altuera du eta zubi altxagarria duen zuloak eta harresi handiek inguratzen dute. Bere itxura dela eta, bisitariak harritu egin ohi dira barnealdean duen auto museoa ikustean.

Concejueloko Gaztelua, Loizaga Dorrea izenez ezaguna bertan dagoen dorrea dela eta, Gueñesen dago, Bilbotik 30 bat kilometrora. Antzinako Erdi Aroko gotorlekua, bere harresiek ibilgailu zahar eta klasikoen museoa gordetzen dute. Bereziki ikustekoa da Rolls-Royce bilduma, munduan bakarra dena marka britaniarraren automobil-modelo guztiak dituelako.

Dorretxeak 25 metroko altuera du eta zubi altxagarria duen zuloak eta harresi handiek inguratzen dute. Bere itxura dela eta, bisitariak harritu egin ohi dira barnealdean duen auto museoa ikustean. Rolls-Royce-ak protagonista gisa, Loizaga Dorrea sei gunetan banatuta dago, hiru Roll-Royce-entzako gordeta. 45 modelo ere aurki ditzakezu, 1910eko Silver Ghost modeloa abiapuntutzat hartuta.

Halaber, museoko auto guztiak ez dira Rolls-Royce-ak. Ferrari Testarrosa kirol-autoak, Hispano-Suiza eta Bentley 30. hamarkadako kotxe klasikoak, edo Ford T gisako seriean fabrikatutako ibilgailuak ere badaude bertan. Guztira, 75 autoko bilduma aurkituko duzu. Automobilaren historia gertutik ezagutzeko aukera paregabea eta erabateko gozamena autozaleentzat!

Bestalde, duela zenbait urte dorretxea ekitaldi handiak ospatzeko dago erabilgarri. Oso esanguratsua izan zen, adibidez, 2016an gazteluan egin zen ezkontza indiarra. Hiru eguneko iraupena izan zuen eta gertakizun oso mediatikoa izan zen, eta prestaketak asteetan zehar oihartzuna izan zuen tokiko eta Estatuko hedabideetan.

Erdi Aroan jatorri duen eraikuntza

Antzinako gotorlekua Otxoa García de Loizagak eraiki zuen XIII. mendean, Leinu gerrak izan bitartean. Loyzaga ganboatarra zen eta XIV. mendean aurkako bandoak, oinaztarrak, gaztelua suntsitu zuen. 1985ean Miguel de la Víaren ekimena izan zen gaztelua berreraikitzea. Dorre berriak antzinakoaren lekua hartu zuen, eta honetatik izena soilik gordetzen du: Loizaga. Gainerako eraikinetik aztarna gutxi batzuk geratzen dira. Galdameseko ikuspegiak dituen aurrealdean Loyzaga eta Murgaren ezkutuak ageri dira, kanpoko erasoetatik babesteko harresi zati bat, eta dorre gezileihoa. Egun dagoen eraikina antzinakoaren gainean dago eraikia.

Gastronomia

Non jan

Hortxe bertan, Galdamesen eta Sopuertan, janari tradizionala eta pintxoak dituzten jatetxe anitz aurkituko dituzu. Indabaz, txorizoz, odolostez, urdaiz eta saiheskiz eginiko Balmasedako putxerak dastatzea nahiago baduzu, hiribildua oso hurbil dago.

Ostatua

Non lo egin

Inguruetako hotel eta ostatuen eskaintza orotarikoa da. Hala ere, nabarmentzekoa da landetxeen presentzia. Erlaxatzeko momentu baten bila bazabiltza, dudarik gabe mendiguneko landetxeetan ostatu hartzea duzu aukerarik onena. Halaber, hirian egon nahiago izanez gero, gogoratu Bilbo 30 kilometrora duzula.