Udaberria Bizkaian

Sasoiko egun argitsuetan hiriguneetako zarataz ihes egin dezazun, plan bikainak proposatzen dizkizugu: erlaxatzeko moduko berdegune inguruak, herrietako ospakizun dibertigarriak eta ekintza gastronomiko gozo-gozoak.

Egun argitsu luzeak, tenperatura epelak, eta tarteka, euria. Horrelakoa da udaberria Bizkaian. Behin neguko egun latzak atzean utzita, martxoaren 20tik ekainaren 21era arte irauten duen denboraldiak eguzkiaz probetxu ateratzeko plan bikainak eskaintzen ditu: pasioak parke eta lorategi inguruetan, kirola aire librean eta ekitaldi gastronomikoak, besteak beste.

Dudarik gabe, Bilboko berdeguneak protagonista izan ohi dira udaberrian, hiriguneko zarata eta trafiko mugimendutik ihes egiteko aukerarik onenak eskaintzen baitituzte.  Casilda Iturrizar parkea, Ahateen parkea izenez ere ezaguna, Bilboko erdiguneko parke nagusia da, bere birika berdea. Belar gune zabalak ditu, pasiorako zirkuituak, bidegorriak, txiki eta nagusientzako jolastokiak, saskibaloi kantxak eta terrazak. Hala ere, bereizi eta ospetsu egiten duena parke erdian dagoen animalientzako esparrua da. Zuhaitzez inguratutako urmaelean, beltxarga, ahate eta arrain espezie ezberdinak daude; inguruetan, antzarak, paumak, urtxintxak eta bestelako animaliak, denak haien etxetxoekin.

Bilbo erdigunetik jarraitzeko, Albia Lorategiak mugimendu handikoak dira ere. Abandoko gune komertzialaren ondoan, eta Justizia Auzitegien parean, lanordu artean deskonektatzeko hautabide ezin hobea eskaintzen dute. Nahiz eta oso handiak ez izan, ondo zaindutako lora eta zuhaitzez beteta dago eta bertatik eraikin enblematikoak ikuskatu daitezke: San Bizente eliza edo Sabin Etxea, esaterako. Bitxikeria gisa, lorategietatik Naviera Aznar eraikina ikusi ahal izango duzu, newyorktar Flatiron figuraren euskal bertsioa. Orobat, pintxo gozoz betetako taberna eta jatetxe ugari daude alderdietan.

Halaber, egun eguzkitsuez gozatzeko, lorategiak bisitatu ondoren, pare bat minututara dagoen Nerbioi itsasadarraren pasioa egitea oso ohikoa da bilbotarrentzat. Bertatik, bi noranzko daude aukeran: Olabeaga kaiarako bidea hartu eta bidetik Zubizuria, Guggenheim museoa eta Karola garabia ikusi; edo Martzana kaiarantz joan eta bidean Udaletxea, Areatza, Alde Zaharra eta Erribera merkatua ikuskatu. Hartzen duzun aukera hartzen duzula, ez dizu hutsik egingo. Ailegatzean giro oneko terraza andana aurkituko dituzu. Gainera, bidea patinekin edo bizikletekin egiteko oso aproposa da.

Bestalde, erdigunea Uribarri eta Begoña auzoekin lotuz, udaletxearen goiko aldean Etxebarria parkea dago. Bilboko parkerik handiena, antzina Bilboko industria fabrika nagusia bertan kokatzen zen, eta egun, adreiluzko tximinia erraldoia bere erdian mantentzen da. Bilbotarrentzat parke enblematikoa da eta udaberriko egun argitsuetan jendez beteta egon ohi da. Egunero aurki daitezke jendetzak belarrean eguzkia hartzen, txakurrarekin pasioan edo lagunartean olgetan. Gainera, kirol maitaleentzako toki paregabea da: skatea egiteko gunea du, bizikletaz eta patinekin ibiltzeko zirkuituak, kirol aparailuak eta footinga egiteko bide zabalak. Maiona futbol zelaia ere bertan dago.

Jarduera gastronomikoak

Bilbotik at, Bizkaiko herrietan udaberriko entretenimendu bereziak daude. Eguraldi onaren heltzearekin batera jarduera gastronomikoak nagusi izaten hasten dira. Merkatuak anitzak dira eta ia herri guztiek dute baten bat garai horretan. Bakoitzak bere berezitasunak baditu ere, zenbait nabarmentzekoak dira.

Maiatzaren hasierako Balmasedako Erdi Aroko Azoka, esaterako, oso esanguratsua da. Jai horrekin, Bizkaiko lehenengo hiribilduak bere sorrera ospatzen du, eta jaki azoka egoteaz gain, biztanleek gertakizun historikoak antzezten dituzte. Gainera, zaldiak, pottokak eta ardiak bezalako animaliak daude. Ezin duzu galdu ikuskizun paregabea!

Halaber, Bizkaiko beste aldean, maiatz amaieran Bermeoko Arrain Azoka ospatzen da.  Tradizio marinela ezagutzera ematea xede du azokak eta jai egutegiari hasiera ematen die. Horregatik, “arrantzale” mahoizko arropa urdin tradizionala urtean lehen aldiz jartzen da Urdaibaiko ospakizun garrantzitsuan, eta Bermeo fanfarren, dantzarien, trikitilarien eta gaitarien giroan murgiltzen da.

Bestalde, txakolinaren mahats-bilketa udazkenan egiten den arren, udaberrian “negarra” fenomenoa deritzona gertatzen da, zeinetan urte amaierako emaitza sasoi horretako denboraldiaren mende dagoen. Horregatik, zenbait herritan Txakoli Eguna udaberrian ospatzen da. Zalla, Urdaibai eta Lezamakoetara joatea gomendatzen dizugu.

Deskontuak

BBCardek eskainitako deskontuak

Erosi