Abentura zaleen 'jolas-parkea'
Zure oporretan edo aisialdian ondo patxadan egotea ez badator zurekin, Bizkaian muturreko kirolak egiteko gune ugari dituzu, adrenalina ere muturrera eramango duzula. Prest?
Naturak baretasuna eman ohi digu, baita abentura kitzikagarriak bizitzeko aukera ere. Zentzu horretan, Bizkaia turismo aktiboaz gozatzeko lurralde bikaina dugu. Kostaldean nahiz barnealdean, badira hainbat kirol eta ekintza iratzargarri eskura, zure bisita esperientzia guztiz ahaztezina bilakatuko dutena, hain zuzen.
Esaterako, ur-kirol eskaintza zabal eta erakargarria daukagu, batez ere gomendagarria uda partean bazatoz. Kanoa jaitsiera edo zeharkaldia, itsas-kayaka, piraguismoa, surfa nahiz urpekaritza egiteko aukera izango duzu Urdaibain, Lekeition nahiz Gorlizen, leku batzuk aipatzearren.
Era berean, Parke Naturaletatik mendi-ibilaldi luzeak edota trekkinga gure kostalde zoragarritik zehar gustuko izango dituzu ere bai. Gogora ezazu Done Jakue Bideak ere badituela Bizkaia zeharkatzen duten pare bat tarte, Markina-Xemeinetik Bilbora, Gernika bide.
Natura bete-betean
Kobazuloak, mendiak eta magiaz beteriko haranak
Maldan gora, urpean nahiz hegan eginez, ez zara batere aspertuko Bizkaian. Turismo aktiboaz gozatzeko hamaika ekintza eta gune dituzu zain, dela kostaldean dela barnealdean. Surfa, piraguismoa, trekkinga, eskiatzea, globoz hegaldia… Eskaintza zabala eta kitzikagarria da. Ongi etorri abentura zaleen paradisura!
Urdaibaiko paradisu naturalean kokatuta, ekintza zentro hau irekita dago martxo amaieratik iraila bitartean. Besteak beste, arku-tiroa, xendazaletasuna, itsas-kayaka, multiabentura jarduera multzoa, kanoa jaitsiera nahiz zeharkaldia edota surfa eskuragarri daude. Azken honi buruz, surflari andana topatuko duzu Mundakan, Bakion edota Sopelan.
Aukera hauek guztiak Lekeition ere egin ditzakezu. Gainera, kayak eta piraguismo ikastaroak ezezik, trekking nobedadea ere eskaintzen dute: kostaldean zehar, hainbat oztopo gainditu beharko dituzu, dela horma malkartsuetan gora eginez, dela itsasoari salto edo igeri eginez, kasu.
Gorlizen, berebat, aipatutako ur-kirolak ere egin ditzakezu bere hondartza luze eta zoragarrian, baita snorkel urpekaritza modalitatea eta ‘outdoor-training’ deritzon entrenamendua, ingurugiro osasuntsu eta iradokitzailean.
Bizkaiko barnealdean ere baduzu non hautatu. Urkiolako Parke Naturalean, adibidez, mendizaletasunaz eta xendazaletasunaz gain, mendiko alde batzuetan eskalada edota espeleologia egiteko aukera ere badago. Neguan, eski-gune ‘ofizialik’ ez duen arren, abenturazale asko eskiatzera animatzen dira.
Karrantza aldean, Karpin Fauna 20 hektareako etxaldea daukazu, bertako haranaren bista ikaragarria duzula. 55 animalia espezie baino gehiago hartzen dituen aterpe paregabea da. Basoan barrena, ibilbide oroigarriaz disfrutatuko duzu, edertasun bereziko ingurune naturala lagun. Bi alde bereizten dira: garai jurasikoari eskainitakoa eta dinosauroak desagertu ostekoa.
Nola heldu
Bai Karpin Fauna, bai Urdaibai ekintza zentroa nahiko eskuragarri daude, garraio publikoaz nahiz autoz hel zaitezkeela. Autobusez edota trenez bazatoz, gogora ezazu ordutegiak eta maiztasuna aldez aurretik begiratzeaz.
-
Trena
Bilbao-Abandon Zallara doan trena hartu (2 ordu inguruko bidaia). Horren ostean, Lusa-El Callejo ibilbidea egiten duen autobusa hartu (A0652), 40 minutu ingurukoa. El Callejo geltokitik ordu erdiko bidaia daukazu oinez, Karpin abentura gunera heldu arte.
-
Autobusa
Garraio publikoaz ere hel zaitezke ekintza zentrora, Bizkaibus A3526 (Gernika-Ibarrangelu) ibilbidea hartuta. Laidako kanpinean dauka geralekua.
-
Autoa
Karpin Fauna: Bilbotik, ordu beteko auto-bidaia da. A-8 autobidea hartuta, Colindres-Burgos irteera hartu ezazu eta ostean N-629 errepidea. Karpin Fauna guneak doako aparkalekua dauka, 350 lekuekin autoentzat eta 5 tokiekin autobusentzat.