Blues eta uda eskutik hartuta ibiltzen hasiko dira Bilbon, urte honetatik aurrera. Bizkaiko hiriburua musika onari lotuta egon da historikoki, eta aurrerantzean lehenengo Nazioarteko Blues Jaialdia gehituko dio bere urteko “kartelari”, datorren uztailaren amaieran.

Apustu kultural sendo bat, hiriko dinamizazioa sustatzeko sortzen dena eta Euskadiko gertaera berdingabe hau mundu mailan proiektatzeko xedez. Hiriko bihotzak blues banda ospetsuenen erritmoan taupadak egingo ditu, eta horiekin batera tokiko talde batzuk ere arituko dira, hitzordu hau famarako abiapuntu bezala aprobetxatu ahal izango baitute.

Lehen Bilbao Blues Festival jaialdia uztailaren 29tik 31ra bitartean egingo da, eta hogei kontzertu eta jarduera baino gehiago izango ditu, guztiak dohainik. Jadanik berretsita dauden kontzertu nagusietako bat Chicagoko All Stars-arena izango da; bertan, iparramerikar hiri horretako hainbat blues-musikari ospetsuk eszenatokia partekatuko dute, banda bat une horretarako osatuz. Beraren partaideak Bob Stroger, Kim Johnson, Mike Avery, Kenny Smith, Billy Flynn, Piano Willie eta Joey Saye mitikoak izango dira. Lehenengo edizio hau aire zabalean egingo da osorik, eta haurrei zuzendutako kontzertu pedagogikoak ere programatu dira, baita emakumeei eta bluesari buruzko hitzaldi bat, kontzertu batekin.

Hitzorduaren agertoki nagusia Areatza izango bada ere, genero musikal hau hiriko bazter guztietara iritsiko da, New Orleanseko estilo peto-petoan, dixie bandek han-hemenka egingo dituzten kalejirei esker.