Izenaduba Basoa: Izena badu, bada
Euskal mitologiari buruzko lehendabiziko interpretazio zentroa dugu Izenaduba basoa, Mungian kokatuta. Olentzerok bertan du etxea, Bizkaiko baserririk zaharrenean
Esperientzia erabat magikoa bizi nahi baduzu, Mungiako Izenaduba baserria bisitatu behar duzu. Familiartean joateko guztiz aproposa da, egun-pasa ederra izango duzu eta.
6.000m2-ko parke zoragarrian barrena, Bizkaiko baserririk zaharrena aurkitzen da, non Olentzerok bere etxebizitza duen. XVI. mende hasieran eraikia, Landetxo Goikoa izenaz ezagutzen da. Balio arkitektoniko izugarria duen ondarea dugu.
Euskal Gabonetako pertsonaiarik kuttunenaren historia eta beste irudi mitologikoena ezagutzeko parada izango duzu, ingurune natural eta atsegingarrian.
Era berean, gure arbasoen bizimodua birgogoratuko duzu, baserriko bizitzak zekartzan xehetasun guztiak azalduko dizkizutela: landa eta abere-lanak, usadioak, sineskerak, hala nola sutondoan kontatzen ziren kondairak, besteak beste. Prest al zaude euskal kultura eta folklorean barrena murgiltzeko?
Bizkaia family friendly
Familiarekin gozatzeko jarduerak
Izenaduba basoko bisitak gidatuak baino, antzeztuak dira, gure pertsonaia mitologiko gogoangarrien eskutik gainera: Lamia, Galtzagorri, Mari Domingi baita Anbotoko Mari bera gidari izango dituzu euskal mitologiaren bitxikeria guztiez jabetzearren. Hori guztia baso liluragarri baten xarma bereziaz inguratuta zaudela.
Guztiz berreraiki den etxaldeko funtzionamenduaren berri jasoko duzu Izenaduban, hau da: garautegia, sua nahiz kearen ustiapena… Horrez gain, haurrek (baita gurasoek ere) jarduera izugarri erakargarriez disfrutatzeko abagunea daukate bisitak irauten duen bitartean.
Adibidez, Izenaduba basoan ‘Sorginen baratza’ topatuko duzu, sendabelarrez josia. Landare-espezie bakoitzaren ezaugarriak ezagutzeaz ezezik, haiekin esperimentatzeko aukera ere izango duzu.
Halaber, Olentzeroren egunerokoaz jabetzeak bere lagunik leialena ezagutzea dakar nahitaez: Napo astoa. Gabonetan, gure ikazkin maitagarriaren laguntzaile prestua da, Euskal Herriko ume guztientzako opariak banatzearen ardura dutela.
Izenaduba esperientzia askoz haratago doa halere. Haur eta helduentzako 3D simulagailua bide, euskal unibertso mitologikoan barneratzea posible izango duzu. Parkeko hainbat jolasen bitartez ere, haurrak Mariren koban sar daitezke, eta bide batez, Tartalo ziklopearekin ‘topo egin’, edota Basajauna irudikatzen duen Haritz Sakratua miretsi. Zuhaitz hau sakratutzat dugu bere zama erlijiosoagatik. Elezaharrari jarraiki, Euskal Herriko hainbat basotan, haritz zaharrenak aipatu jainko iletsu eta indartsu hau irudikatu ei du.
Beraz, gure kultura eta historia ezagutzeaz gain, egundoko bizipena ziurtatuta duzu XVI. mendeko baserri honetan. Horra, horra gure Olentzero!
Nola heldu
Olentzeroren etxea Mungian dago, Bilbotik oso hurbil, alegia. Autoz zein autobusez hel zaitezke erraz.-
Autobusa
Bilbotik, badira hainbat Bizkaibus ibilbide Mungiara. Adibidez, A3516 (Bilbo-Mungia autobidetik), A3518 (Bilbo-Mungia-Bakio autobidetik) edota A3527 (Bilbo-Mungia-Bermeo autobidetik) autobusek Mungian dute geltokia.
-
Autoa
Mungia eta Bilbo artean 20 km eskas daude. BI-631 errepiderako argibideak jarraitu itzazu, Aireportua/Mungia norabidean. Mungiako irtenbidea hartu; ondoren, Lauaxeta Olerkari kaletik segi, Landetxo kalera heldu arte. Berehala ikusiko duzu Olentzeroren etxea. Aparkalekuari dagokionez, parkeak autoentzako 60 plaza ditu, doan. Autobusentzako parking-a ere badago.
Non jan
Mungia aldean euskal sukaldaritza tradizionaleko jatetxe erakargarriak topatuko dituzu. Gainera, kontuan hartu hainbat txakolin-upeltegiak dituzula inguruetan, esperientzia gastronomiko guztiz gomendagarria eskainiko dizkizutenak.
Bilbo aldean, berriz, pintxo-ibilbide gozagarria jarraitu dezakezu familian, edota betiko taberna batean eguneko menua hartu. Gastronomia garaikidea ere dastatu dezakezu gure karta oparoan, sukaldaritza minimalista, Michelin izarduna nahiz berritzailea eskaintzen duten jatetxe ugari baititugu, batez ere Zabalgunean.
Non lo egin
Mungiako herrigunean pare bat hotel gomendagarri dituzu. Halaber, azpimarratzekoak dira inguruko landetxeak; beraz, euskal bizimodu tradizionala %100ean ezagutu gura baduzu, baserri batean ostatu hartzea iradokitzen dizugu. Jauregi batean lo egiteko apeta baduzu, bestalde, kontuan hartu Mungian Urgoiti Jauregi entzutetsua dagoela. Historia eta ospe handiko eraikin hau XVII. mendekoa da, eta bere golf azpiegiturengatik ere nahiko ezaguna da.
Betiere, Bilbo oso gertu daukazu, beraz, hiriguneko ostatu-eskaintza zabala ere aintzat har dezakezu. Izardun hotel modernoetatik aterpetxe xumeetara, familia osoarentzako aproposak diren ostatuak aukeran dituzu urte osoan zehar.