Bilbao Bizkaian surfa egiteko hondartzarik onenak
Ba al zenekien Bilbao Bizkaia surfa egiteko Europako helmuga nagusietako bat dela? Bai! Jarraian azalduko dizugu zergatik.
Itsasoarekiko dugun maitasuna argi eta garbi islatzen da gure lurraldean surfa egiten duten pertsonen kopuru handian. Horregatik, Bizkaian surflari, sharper eta sektoreko marka ospetsu asko daude, mundu osoan ezagunak direnak.
Surfean duzun maila dena dela, gure kostaldean mota guztietako olatuak aurkituko dituzu: kirol honetan hasi berri direnentzako olatuak nahiz eskarmentu handiko surflarientzako olatu harro eta zirraragarriak.
Bilbao Bizkaian surfa egiteko lekurik onenak
Galea Lurmuturra, Getxo
Europako olatu handi eta arriskutsuenak Galea Lurmuturrean daude, Getxon. Itsaslabar baten irtengunea da, eta hondo harritsua eta 6 metroko altuera gaindi dezaketen olatuak ditu. Olatu handiak surfeatzeko zailtasunari uretan murgildutako harkaitzek eragindako arriskua gehitu behar zaio. Horregatik, Galea Lurmuturreko olatuak eskarmentu gehien duten surflarientzat bakarrik dira egokiak.
Olatuak irailetik martxora izaten dira handienak, marea ertain-altuarekin edo altuarekin. Bertan, Punta Galea Challenge ospatzen da urtero, Europako surf ekitaldirik zaharrena, eta diziplina honetako surflari onenak elkartzen dira bertan. Ikusteko moduko ikuskizuna.
Mundaka
Gure lurraldeko harribitxia Urdaibain dago. Europa osoko ezkerreko olaturik onena da. Horren adierazgarri gisa, Mundaka 9 aldiz izan da Munduko Zirkuituaren egoitza, eta bertan izan dira Kelly Slater, Mark Occhilupo, Aritz Aramburu eta Kepa Acero surflariak, besteak beste. Olatuak hodi forma du, eta 4 metroko altuera eta 400 metroko luzera izan ditzake.
Olatu honetan surfa egiteko garairik onenak udazkena eta negua dira, itsasbehera aurreko eta ondorengo 2 orduen artean, gutxi gorabehera. Olatu zorrotza da eta, beraz, ez da egokia hasiberrientzat. Are gehiago, nahiko maila aurreratua izatea gomendatzen da.
Gainera, Mundakako Talaiak ikuspegi ikusgarriak ditu ikuskizun honetaz lehorretik gozatu nahi duten pertsona guztientzat.
Meñakoz
Bilbotik 20 minutu eskasera, Sopela eta Barrika artean, olatu harroz eta hondo harritsuz beteriko hondartza basati hau dago, 400 metroko zabalera baino ez duena. Hondartza txikia izan arren, mundu osoan ezaguna den 5-6 metroko altuerako olatu handi bat du, adituek bakarrik surfeatu dezaketena. Ez da arriskutsua olatuaren tamainagatik bakarrik, ur azpian ezkutatzen diren arroka handiengatik eta olatuek talka egiten duten itsaslabarragatik baizik.
Meñakoz hondartzara autoz irits daiteke, edo oinez, Bizkaiko kostaldeko itsaslabarretatik igarotzen den Getxoko pasealekutik. Ibilbidean zehar, itsasoaren ondotik goazela, gure kostaldean sortzen diren olatuen formazioak ikusi ahal izango ditugu.
Sopela
Surfa egiteko Bizkaiko hondartza ezagunenetako bat da. Hondoa hondarrezkoa da batik bat, eta olatuek eskuin zein ezkerrera jotzen dute. Sopelan olatuak hartzeko garairik onena negua da, baina udan ere olatu politak sortzen dira, gozatzeko eta ondo pasatzeko.
Foto: Alberto Varela
Sopela da surfa gehien arnasten den tokietako bat, kirol horretan espezializatutako tabernak, dendak eta eskolak baitaude. Esan daiteke herri honetako biztanleak besapean surf-taula bat hartuta jaiotzen direla.
Surfaren kultura Bilbao Bizkaian
Bizkaian surfaren kultura handia egon da beti. Gure orografiak horretarako aukera eman digu; izan ere, Kantauri itsasoak bustitako 150 kilometrotik gorako kostaldea daukagu, eta bertan olatu ezin hobeak daude taula hartuta batetik bestera ibiltzeko. Mundaka, Galea Lurmuturra, Sopela eta Meñakoz dira, argi eta garbi, Bilbao Bizkaiko spot esanguratsuenak, baina ez bakarrak. Bakio, Muskiz, Gorliz edo Lemoiz ere surfa egiteko toki ezagunak dira gure lurraldeko surflarien artean.
Gure surfaren kultura argi eta garbi islatzen da, halaber, mundu osoan ezagunak diren kirolari ezagunengan, hala nola Garazi Sanchez, Aritz Aramburu, Leticia Canales, Natxo Gonzalez eta Kepa Acero, eta gure lurraldean dauden surf-eskola ugariengan.