Bilbao Bizkaia itxaroten daukazu
Edozein aitzakia ona da Bizkaiko txoko ezezagunenak ezagutzeko eta amets eginarazi ziguten lekuetara itzultzeko. Laster elkarrekin egongo gara berriro!
Aire librean gozatzeko gogoa dugu. Kostaldean eta naturan, gure lagun taldearekin, gure kuadrillarekin, betikoekin. Beste behin ere, Bilbao Bizkaia gustu guztietarako planekin itxaroten daukagu.
Uda gertu dugula, eta udaberri ezberdin baten ondoren, nahi ditugun pertsonekin berriro elkartzeko eta elkarrekin gozatzera irteteko planak egiteko unea iritsi da. Gainera, uda ezberdin hau aukera paregabea izan daiteke gure historiaren zati diren eta aspaldian bisitatu ez ditugun lekuetara itzultzeko.
Bilbao Bizkaia itxaroten daukazu
Itsasotik ikuspegiak
Bilboko itsasadarrean kayak, kanoa edo paddle surf ibilbideak taldean egitea plan bikaina da udaz lagunartean gozatzeko. Edo oso ezagunak ez diren txokoak aurkitzea Urdaibai Biosfera Erreserbaren bidez, Ondarroa inguruan, Lea eta Lekeitioko uretan, edo Plentzia eta Butroeko Gazteluaren artean.
Bizkaiko kostaldea konpainia onean ezagutzeko beste modu on bat itsasontziz egiten diren irteerekin da, Gaztelugatxe, Urdaibaiko kostaldea, Bizkaiko Flysch-a Barrikan edo Bilboko erriberak ezohiko ikuspegietik berrezagutzeko. Edo Kantauri itsasoan Santurtzitik edo Bermeotik sartzea, bertako uretan bizi diren zetazeoak ikusteko.
Eta izpiritu abenturazalea duten taldeentzat, berriz elkartzeko plan ezin hobeak dira Getxon urpekaritza egitea edo Sopelan parapentean aritzea.
Gustu guztietarako hondartzak
Bizkaiko kostaldeko 150 kilometroak betetzen dituzten hareatzetako edozeinetan eguna pasatzeko gogoa al duzue? Alde batetik, lasaienak Muskizeko La Arena, Getxoko Ereaga eta Arrigunaga, Gorliz, Plentzia, Ea edo Lekeitioko Isuntza hondartzak dira; beste alde batetik, giro biziagoarekin, surfa edo kayak bezalako jarduerak praktikatzeko aproposak, Bakio, Laidatxu, Gorrondatxe, Arrietarra edo Barinatxe. Bermeoko Aritzatxuko kala ezkutua eta Ispasterko Ogeia basatia ezagutzeko une egokia ere bada.
Naturara itzultzea
Naturaz gozatzeko aukerarik onenak Bizkaiko Parke Naturaletan aurkituko dituzue. Urdaibaiko Oka ibaiaren ibaiertzetan eta paduretan zehar ibili zaitezkete, eta beren migrazioak estuarioan gelditu dituzten hegazti migratzaileak ikusi; Gorbeiako Gurutzeraino igo eta Bizkaia osoa gure oinetan ikusi; Urkiolan, Mariren etxean, mendi-ibiliak eta alpinismoa egin; eta Armañonen lur azpian sartu, Pozalaguako kobazuloaren ikuskizun bikainarekin liluratzeko.
Lagunekin ere egin dezakegu topo, ibilbideak eginez gure baso eta mendietako naturaz gozatzeko, edo, agian, Donejakue bidea Markinatik Kobaroneraino eginez. Nork ez du amestu egun batez artzain izatea eta ardi latxen artaldea Urkiolako Parke Naturalean zehar gidatzea?
Kuadrilla bizienek Bakio eta Abadiño errepideak inguratzen dituzten paisaiak bizikletaz zeharkatu ditzakete, edota Butroeko Gazteluaren inguruak zaldiz. Lasaienek, berriz, Muruetan, Armintzan edo Meatzaldean Lurraldeko aberastasun geologiko harrigarria ezagutu dezakete.
Altuerari beldurrik ez diotenentzat eta Bizkaia airetik ikusi nahi dutenentzat, aukerarik gomendagarrienak Urduñan ultrarinean edo Orozkon eta Zallan parapentean ibiltzea, edo Nerbioi ibaiaren jaiotzaren ur-jauzi ikusgarria globoan hegan ikustea dira.
Baina, benetan gustatzen zaizuna inguru naturaletan paseatzera joatea, kirola egitea eta, ondoren, zure taldearekin naturan bazkaltzera esertzea bada, Bizkaiak aisialdirako zabalgune anitz ditu, inguruneaz gozatzea errazten duten ekipamenduak dituztenak.
Zuen plana edozein dela ere, Bilbao Bizkaia itxaroten daukazue.
Bilbao Bizkaia itxaroten daukazu