Jalgi hadi dantzara!
Bizkaia mugimenduan da etengabe, musikari dantzarik dantza. Bilboko Orkestra Sinfonikotik hasita Getxoko blues, jazz eta folk jaialdiak arte, hemen baduzu soinu-banda dantzagarria
Edozein dela Bizkaira zatozen unea, musika eta dantza ekitaldi erakargarriak izango dituzu aukeran. Musika klasikoaren alorrean, esaterako, tradizio eskerga dugu.
Bilboko Orkestra Sinfonikoa (BOS) 20ko hamarkadan sortu zen, bere lehenengo kontzertua Arriaga Antzokian eman zuela 1922an.
Harrezkero, ibilbide oparoa jarraitu du; kontzertu sinfoniko eta ganbera-musikaz gain, ezohiko ikuskizunetan ere parte hartzen duela.
Euskal dantza tradizionalak eta garaikideak maisuki egin dute bat gurean. Euskalduna Jauregia, BBK Aretoa, Arriaga nahiz Campos Eliseos Antzokiak, esaterako, horren egoitza dira. Bertan topatuko dituzu Moskuko Bolshói balleta, euskal antzerki eta dantza konpainien azken lanak hala nola Adams Familiari buruzko musikala familian disfrutatzeko, esaterako.
Horrez gain, kanpoko aisialdia bereziki gustuko dugunez, ez zaitez harritu kale antzerki jaialdi edota dantza ikuskizun batekin egiten baduzu topo hirigunean.
Gure kultura zaindu eta sustatzearekin batera, musika eta dantza garaikidearen azken nobedadeak harmoniaz txertatzen ditugu gure eszenatokietan. Diseinu liluragarria eta balio historiko handiko eraikinek barne hartzen dute hamaika ikuskizun egunero, urte osoan zehar.
Bere sorreratik, musika klasikoa jendartean zabaltzeko xedea izan du Bilboko Orkestra Sinfonikoak (BOS). 1958an, Rafael Frühbeckek hartu zuela zuzendaritza, ‘Carmina Burana’ lehenengo aldiz entzun zen oso-osorik Estatu mailan. Geroztik, bakarlari nahiz abeslari entzutetsuekin jo du, hala nola: Alfredo Kraus, Montserrat Caballe, Placido Domingo, Luciano Pavarotti, Ainhoa Arteta, Arthur Rubinstein, Nicanor Zabaleta, eta, jakina, Bilboko Seme Kuttuna den (beste ohoreen artean) Joaquin Achucarro.
BOS-ek Euskalduna Jauregian du egoitza. Bizkaiko Foru Aldundiaren titulartasunpean, Federico Soriano eta Dolores Palacios arkitektoek sortu zuten eraikina, ontziola ospetsuaren omenez. Bertan batzar profesionalak eta era anitzeko ekitaldi publikoak antolatzen dira. Arlo kulturalean, musika eta dantza klasikoak nahiz modernoak leku dute, zarzuelatik ballet klasikora, baita antzezpen abangoardistak ere.
Entseguak eta kontzertuak garatzeaz gain, BOS-ek ekimen didaktiko interesgarriak bultzatzen ditu bertan. Adibidez, ‘Trakamatraka’ tailerrak musika-tresnak sortzen ditu material birziklatuekin; eta ‘Adoptatu musikari bat’ ekimena bide, Leonard Bernsteinen ‘West Side Story’ gisako musikal batean parte hartzeko aukera dute ikasleek.
Hirigunetik irten gabe, BBK Aretoak kalitatezko programazioa ere badauka. Jazza, flamenkoa, fadoa hala nola trikitixa eta txalaparta soinuak entzungo dituzu. 2010etik hiri osoari irekita, bertoko eta nazioarteko ehunka artista igaro dira bere eszenatokitik.
Jaialdirik jai
Etxe barruko ohiko programazioaz gain, urtean zehar jaialdi ugari antolatzen ditugu -mundu mailan jada ezagunak diren BBK Live eta BIME jaialdiez haratago-. Horietako asko ospe handikoak dira, Musika-Música ekimena, kasu. Genero klasikoaren ‘maratoi’ honek 70 emanaldi eta 1.500 musikari baino gehiago hartzen ditu. Prezio eskuragarrian, nazioarteko erreferentziazko hitzordu kultural eta pedagogikoa bilakatu da.
Halaber, BBK Aretoak barne hartzen duen Musiketan jaialdia bide, Elliott Murphy, Ara Malikian, Mary Black eta Bebo Valdes gisako artistek parte hartu dute, beste askoren artean. Estilo aniztasuna bereizgarri, ziklo honek 90.000 bat ikusle erakarri ditu.
Hasiberritzat har dezakegun jaialdia dugu Loraldia, Anton Abbadiak 1879an sustatu zituen Lore Jokoek iradokituta. Udaberrian, era anitzeko kultur-adierazpenak ‘loratzen’ dira hirigunean, euskal sormena goraipatzeko xedez. Udazken-negu partera, Bilbo flamenko-kantari eta dantzarien xarmaz inguratu ohi da; eta Gabonetan, hiriko abesbatza guztiek koru-kontzertuak eskaintzen dituzte, giro gogoangarrian.
Bilbotik at, bereziki nabarmenak dira Getxoko folk, jazz eta blues jaialdiak, tradizio handikoak. Era berean, aipatzekoak dira Ziortza-Bolibarreko Antzinako Musika Festibala, hala nola Bermeoko Nazioarteko Musika nahiz Portugaleteko Folklore Jaialdiak.
