Bizkaian ardo ona eta koadrilarekin egotea gurtzen dugu. Beraz, zaletasun horiek lotzeko, denboraren poderioz poteoan ibiltzeko artea garatu dugu, gure lagunekin bizitzaz hitz egiten edo abesten dugun bitartean ardoak edatea, hurrengo tabernara beste erronda baterako pasatzeko. Jakina, errondan ibiltzeko txakolin ona ez ezik, jateko zerbait ere behar da; beraz, poteoan ibiltzean jateko zerbait hartzeko beharra konpontzeko sortu ziren pintxoak, gure beste zaletasun bat gehituz: janariarekiko grina.

Tradizio honekin hasi zenetik irensten diren ‘txikitero arrautzak’ izena jasotzen duten arrautza gogortuekin hasiz, patata-tortillaren mila eta bat bertsioetatik edo Gilda sublime eta sinpletik pasatuz, eta gaur egungo miniaturazko goi-mailako sukaldaritzaren lagin harrigarrietara heldu arte, pintxoak errituala bihurtu dira. Izan ere, eztabaida sutsuak izaten dira txanpiñoi plantxan onenak zer tabernatan prestatzen diren, eta auzo edo herri bakoitzeko pintxorik onenak aukeratzeko lehiaketak antolatzen dira.

Bizkaiko lurralde osoan lehen mailako pintxoak aurki badaitezke ere, Bilbo hiriko bihotza den Alde Zaharra sukaldaritza-artelan gozo honen maitaleentzako leku saihestezinetako bat da, #FoofLoversentzat nahitaez bisitatu beharrekoa tokia. Ehunka taberna, kafetegi, ardotegi, eta jatetxe daude Bilboko kale historikoenetan, eta kondairaz eta monumentuz beteta ez ezik, Bizkaiko eta munduko pintxo-eskaintzarik handienetako bat - eta onenetakoa, bilbotarrek diotenez - ere badute.

Nahiz eta metro gutxi batzuek bananduta egon, koadrilei bere eremuak aukeratzen dituzte eta horietan mugitzea gustatzen zaie: Plaza Berria, ataripeen aterpea eta terrazentzako espazio zabala eskaintzen dituena; Somera kalea, txikiteorako tradizionalenetako bat; Santa Maria, Pilota eta Txakur kaleen elkargunea, beti ere jendez gainezka; Barrenkale eta Barrenkale Barrena, gautarrak direnak; eta Unamuno plaza eta María Muñoz eta Iturribide kaleak, egun osoan zehar animatuak.

Eremu horietako edozeinetan, edo inguruko kaleetan, pintxoak barretako izarrak dira, eta goizetik gauera Bizkaiko pintxo tradizional edo berritzaileenetako batzuk dasta daitezke ostalaritzako establezimenduetan.

Alde Zaharrean pintxotan ibiltzean gogoratu behar den gauza bakarra da bertoko jatetxe tradizionaletan bazkaltzera edo afaltzera joateko gose apur bat beti gorde behar dela Izan ere, kale estuen eta plaza txikien labirinto honetan daude Bilboko jatetxerik tradizionalenetako batzuk, non gure gastronomiari hainbesteko ospea eman dioten betiko errezetak dasta baitaitezke.

Erriberako Merkatua kalitate bikaineko lehengai baten hornitzaile da: Bizkaiko kostaldeko portuetako arrainak, Lurraldeko barnealdeko baserrietako haragiak eta barazkiak... Hori dela eta, janari tradizionaleko jatetxeak leku bikaina dira gure errezeta tradizionalak probatzeko: bakailaoa pilpil edo bizkaitar erara, marmitakoa, txipiroiak, antxoak, legatza, pistoa, piperrada, edo txuleta on bat.

Alde Zaharretik eta Bilbotik kanpo ere badaude ezagutzeko jatetxeak eta jaki tipikoak: Ondarroako erara prestatutako legatz zaporetsua; Santurtziko sardina erre ospetsuak; edo babarrunak,  Bizkaiko bi lekutan bereziki gozo prestatzen direnak. Bata, Zugaztieta, ia ehun urte dituen funikular batean igoz aurkitzen dugun garai bateko meatze-zentroan prestatutakoak, bere sakramentuak eta guzti. Bestaldera Kadagoa bailara estuan barrena trenez bidaiatuz topatzen dugun Balmaseda, Erdi Aroko hiria, non ‘putxeretan’ prestatzen baitira, lehengo trenbideetako langileek egiten zuten bezala.

Ezin da erabaki zein diren hobeak; beraz, onena biez gozatzea da, eta hobe txakolin on batekin bada, itsasoko airearen eraginpean hegoaldeko magaletan hazitako ardo zuri frutatsua. Eta, postrerako, gozoenen artean ere bada zer aukeratu: karolina, pastel errusiarra, Gernikako ori-baltzak eta Markina-Xemeingo kokoteak, edo beti gozoa den Idiazabal gazta.

Bizkaian tradizio handiko zaporeak dastatuko dituzu, eta Michelin izardun jatetxeko proposamenek ere tentatuko zaituzte. Halaber, nazioarteko azken nobedadeak edota gure errezeta kuttunenak ikasteko parada ere izango duzu.